Розпатра ше предкладаня за културни добра значни за руску заєднїцу

автор сен
1.2k Опатрене

РУСКИ КЕРЕСТУР – Одбор за културу Националного совиту Руснацох (НС) вчера отримал свою другу порядну схадзку, а на дньовим шоре було и приношенє Предкладаня о рухомих и нєрухомих културних доброх хтори окреме значни за руску националну меншину у Сербиї.

Културни добра у нашей заєднїци, хтори держава уж защицела, НС планує дополнїц и вимагац же би ше их преглашело за памятнїки, односно културни добра значни за Руснацох. На тот способ ше числени обєкти, памятнїки, парцели, писани документи и други скарб тирвацо охранї, а од фаховцох з обласци за защиту памятнїкох – др Миряни Дєкич, ма Сашу Сабадоша и Любици Отич, сцигли списки обєктох и другого скарбу хтори би могли буц окреме значни за Руснацох. На вчерайшей схадзки заключене же Одбор за културу по 15. април конкретизує списки и прешлїдзи их НС на прилапйованє.

1-Odbor-02

Члени Одбору за културу вчера єдногласно прилапели предкладаня за рочни награди Заводу за културу Войводини, так же за Награду „Искри култури”, хтору ше додзелює младому авторову до 35 роки за сучасну творчосц, Одбор предложи шпивачку и авторку Саню Полдруги. За Медалю култури за мултикултуралносц и интеркултуралносц др Миряну Дєкич з Покраїнского заводу за защиту памятнїкох, за Медалю култури за очуванє културного скарбу Мирона Жирош, а за Медалю за цалосну творчосц/роботу Дюру Латяка.

На вчерайшей схадзки менована и совитодавна Комисия за провадзенє и унапредзованє програмней часци наших фестивалох и манифестацийох, у зависносци од обласци. До Комисиї меновани Мирослав Пап, Михал Лїкар, Агнета Тимко Мудри, Миломир Шайтош, Микола Ґубаш, Михайло Зазуляк, Лидия Пашо, Йоаким Рац и Юлиян Рамач.

1-Odbor-03

На схадзки Одбору за културу принєшена и Одлука о финансийним планє за 2016. рок, по хторим тото цело НС будзе розполагац з милион 850 000 динари. Векшина – милион 350 000 динари – будзе унапрямена на софинансованє 22-ох тогорочних манифестацийох по наших местох, а остаток пенєжу опредзелєни за потримовку у афирмованю фолклору, хорского шпиваня и музичней творчосци.

На схадзки прилапени и конєчни Календар репрезентативних манифестацийох Руснацох у 2016. року.

ПОВЯЗАНИ ТЕКСТИ