Розписани конкурси з обласци польопривреди, медзи нїма и за старецки ґаздовства

автор сен
910 Опатрене

НОВИ САД – Покраїнски секретарият за польопривреду, водопривреду и лєсарство розписало три конкурси и єдну явну оглашку за додзельованє стимулацийох у обласци польопривредней продукциї.

Конкурс за софинансованє инвестицийох до физичних средствох у польопривредних ґаздовствох, як цо то опреманє хладзальньох, сушарох, набавка опреми за пририхтованє, умиванє, полированє, чисценє, сортированє и пакованє овоци, желєняви и преробок олєйових рошлїнох. Безповратни средства по тим конкурсу годни достац и пчоларе.

Реґистровани фарми з АП Войводини можу конкуровац за набавку опреми за статкарски и фарми живини, дзе и за опрему за доєнє, хладзенє и чуванє млєка, та опрему за гноєнє.

Розписани и конкурс за додзельованє средствох за софинансованє инвестицийох за преробок овоци, грозна и желєняви, односно набавку новей опреми за сушенє змарзованє, бланширанє, пастеризованє, стерилизованє, приманє, преробок, полнєнє и пакованє продуктох з овоци, грозна и желєняви.

Шицки три конкурси тирваю покля ше нє розподзелї средства, а найпознєйше по 30. септембер 2016. року.

Ношителє и члени реґистрованих польопривредних ґаздовствох старши од 65 роки ше можу явиц на явну оглашку за стимулациї за обрабяцу жем хтору дали под аренду у тим року. Явна оглашка отворена покля ше нє потроша средства, а найпознєйше по 28. април 2016. року.

ПОВЯЗАНИ ТЕКСТИ