Рочнїца народзеня Василя Турока Гетеша

автор акад.русин.култ.слов./зам
924 Опатрене

ПРЯШОВ – З пригоднима текстами, Русини у Словацкей 8. януара означели 75-рочнїцу народзеня Василя Турока Гетеша, єдного з найзначнєйших за русински препород у Словацкей и Русинох у штреднєй Европи, ґимназийского и факултетского професора, драматурґа, визначного културного и дружтвеного роботнїка у Словацкей и ширше, першого предсидателя Русинскей оброди у Словацкей, як и инициятора и першого предсидателя Шветового конґресу Русинох/Руснацох/Лемкох (ШК РРЛ).

Василь Турок Гетеш народзени 8. януара 1940. року у Габури коло Медзилаборцох, штредню школу и Универзитет Коменского закончел у Братислави 1963. року, а потим вецей як два децениї преподавал словацки и русийски язик, филозофию и естетику у Українскей ґимназиї у Пряшове. Познєйше преподавал и на Православним богословским факултету у Пряшове.

Од 1985. року Турок прешол за драматурґа до тедишнього Українского народного театру, терашнього Театру Александра Духновича, котри, дзекуюци йому, концом 80-тих рокох почал бавиц представи на теди ище нєкодификованим русинским язику, познєйше пременєл мено и свою ориєнтацию на русинску, по чим ТАД нєшка препознатлїви у Словацкей и иножемстве. На поволанку Турока Гетеша представи у ТАД од теди почали пририхтовац и велї значни режисере зоз Словацкей и поза єй гранїци, цо тиж допринєсло афирмованю и наградзованю ТАД и його ґлумцох у жеми и иножемстве.

После „Блишовей револуциї” у тедишнєй Чехословацкей 1989. року, Василь Турок Гетеш бул на чолє русинского препороду и бул перши предсидатель Русинскей оброди, кеди почали виходзиц перши новини по русински у Словацкей – „Народни новинки”, закладал ше за радио и ТВ-емисиї по русински на державних медийох, мал улогу и у снованю окремного русинского оддзелєня на Пряшовским универзитету, з хторого 2008. року там настал терашнї Институт русинского язика и култури.

Бул єден з главних сновательох и перши предсидатель ШК РРЛ, бул член Вивершного одбору Медзинародней орґанизациї „Мезон де Пеї” у Французкей, хтора репрезентує народи без власней держави, а 2001. року достал и Награду за визначне дїло за русински народ Карпаторусинского наукового центру у ЗАД.

Василь Турок Гетеш умар 7. новембра 2005. року у Пряшове.

ПОВЯЗАНИ ТЕКСТИ