РУСКИ КЕРЕСТУР – Новинско-видавательна установа (НВУ) „Руске слово” ма примарну улогу у рускей заєднїци, гварел предсидатель Националного совиту (НС) Руснацох Славко Рац у дискусиї о звитох и планох роботи тей установи на штвартей схадзки НС, 28. марца у Руским Керестуре. Звит о роботи и финансийни звит за 2014. рок Совит єдногласно прилапел, а тиж єдногласно дал и согласносц на план роботи и финансийни план „Руского” за тот рок.
Звити и план членом Совиту потолковала директорка „Руского” Мартица Тамаш, котра визначела же до тогорочного означованя 70-рочнїци новинох, „Руске слово” вошло з новим форматом и випатрунком самих новинох, часопису МАК, веб-сайтом, же у планє видац 10 нови кнїжки, а и надалєй поряднє видавац часописи „Шветлосц” и „Заградка”. Наглашела и же Установа позитивно дїловала, „Руске слово” нє ма нїяки длуства, Установу ше на вецей заводи презентовало ширшей заєднїци, а як можлїви нови трошок у тим року будзе плаценє кириї за просториї у новосадским „Дневнику”.
Члени НС з Новог Саду зауважели же ше слабо провадзи подїї у рускей заєднїци у Новим Садзе, дзе шедзиско Установи та, як гварела Наташа Макаї Мудрох, а потримал Миломир Шайтош – „буду вимагац дописователя за „Руске” з Нового Саду”, так як то ушорене за други места. Бо, як гварел Шайтош – „кед дацо нє зазначене у „Руским слове” – як кед би ше анї збуло”, так же би то мало буц ришене у рамикох орґанизованя роботи у „Руским слове”.
Совит єдногласно прилапел и финансийни звит и план роботи за 2014. рок Заводу за културу войводянских Руснацох, а вязано за Завод, на початку схадзки, при прилапйованю записнїкох зоз скорейших схадзкох НС Мирон Сабадош зауважел же ше план роботи и финансийни план Заводу за 2015. рок прилапйовало на електронскей схадзки Совиту, а Юлиян Ковач же ше исти прилапйовало на електронскей схадзки Управного одбору (УО) Заводу. Як потолковал директор Заводу Серґей Тамаш, плани пред тим детально вианализовани на порядней схадзки УО, а електронски су прилапйовани пре цо ефикаснєйше доставанє средствох од финансиєра, цо наглашел и предсидатель НС Славко Рац.
Рац и на писмено предочел же перши средства до Заводу того року сцигли уж 13. марца, прешлого року то було 10. марца, а 2013. року 9. априла, дзекуюци ефикаснєйшому доручованю планох финансиєрови. Винєсол же од 2010. по 2012. рок перши средства Заводу сциговали аж початком, лєбо концом юния.
Бешедуюци о звитох, Тамаш визначел вецей проєкти, медзи нїма же прешлого року почало витворйованє идеї о прекладаню литературних творох наших авторох на странски язики, же у окремней едициї почало обявйованє мастер-роботох наших студентох, а афирмованє роботи младих и далєй будзе єдно з главних опредзелєньох. И Тамаш и дзепоєдни члени Совиту визначели добре сотруднїцтво Заводу зоз шицкима нашима институциями, та и другима заводами, а як гварел директор Заводу – тота институция достава тренд елитней рускей културней установи на ширшим уровню, як професийним, так и аматерским.
Єдногласно прилапени звити и плани РНТ „Петро Ризнич Дядя”, хтори на схадзки Совиту предочела директорка Театру Ивана Дудаш, дзе наглашене же други рок за шором Театер позитивно дїлує, а вше вецей витворює и копродукцийни представи з КУД по наших местох. Витворює ше и главне опредзелєнє же би ше з представами цо вецей госцовало по наших местох.
И надалєй найвекши проблем же финансиєр потримує лєм витворйованє представох, нє и материялни трошки. Тиж же РНТ-у зменшани средства на лєм за єден проєкт, так же Дудашова на схадзки подзековала НС же концом прешлого рока, як снователь, опредзелєл средства за витворенє и другей представи. Директорка РНТ визначела же Театер нашей драмскей творчосци доприноши и з розписованьом конкурсох за нови драмски тексти по руски, та резултати найновшого буду познати у маю.