Руски стипендиї

автор и. сабадош
548 Опатрене

Праве у Дзецинским тижню, достали зме розришенє велькей дилеми хтора, кед би єй розплєт бул иншаки, под знак питаня могла положиц и саму сущносц и есенцию отриманя и витворлївосци нашей меншинскей културней самоуправи. Як цо зме писали, у процесу пременкох законодавства у домену меншинских правох, и їх примени на дотерашнї пракси, якошик випадло же Национални совит, прейґ свойого Одбору за образованє, вецей нє будзе мац право додзельовац школярски стипендиї зоз буджетских приходох, алє лєм зоз власних финансийних средствох – хтори нє ма. Лєм одвичательни зоз Совиту, його Служби и Одбору за образованє знаю же як, алє тота одлука розпатрена ище раз, и претолковане же дотерашнї способ стипендованя може буц предлужени и далєй.

Стипендованє школярох єдна з ридко конкретних и континуованих акцийох Националного совиту Руснацох. Запровадзує ше од школского 2011/12. року, потримовали ю и предлужовали шицки зволаня Совиту потераз, а з часом ше лєм звекшовала єй сума и обсяг. Стипендиї руским предшколцом, першокласнїком, ґимназиялцом и студентом висших рокох нашей Катедри єдна з найважнєйших и найвекших мирох, кед слово о популаризованю образованя на мацеринским язику. Мотивованє дзецох и родичох же би ше одлучели за руски оддзелєня, школи и студиранє, односно отримованє и звекшанє числа школярох у образовней системи по руски, источашнє и доказ и потвердзенє же вона потребна, оправдана и нєобходна. З другима словами, маме конєчни арґумент пред законодавательом лєбо финансиєром, односно державу, кед ше раз, дакеди, дахто, можебуц опита – Чи наисце без того нє можеце?

У єдним моменту випатрало же нам тот арумент будзе вибити з рукох. Чи пре уж узвичаєну колизию предписаньох, чи пре поверхове и паушалне їх толкованє, чи пре бирократске препущенє, анї нє такой таке важне. Важне лєм же з нашого боку реаґоване такой, а компетентна державна служба, Канцелария за людски и меншински права добре и одвичательно поробела свою роботу. Предписаня претолковани так же уважене сущне значенє стипендийох, а нашо школяре их годни достац и того року.

Хто зна цо будзе нарок, лєбо можебуц уж по нєдзелї, лєбо наютре, алє голєм нєшка маме причину оддихнуц.

ПОВЯЗАНИ ТЕКСТИ