НОВИ САД – После двох рокох павзи, за школярох новосадских штреднїх школох знова отворена можлївосц за факултативне виучованє руского язика з елементами националней култури. Як за емисию Радио Нового Саду „Останьце нашмеяни” спред Дружтва за руски язик, литературу и културу гварела Ирина Папуґа, од Технїчней школи „Милева Марич Айнштайн” знова достате дошлєбодзенє же би ше, по ярнїм розпусту, годзини отримовало у єй учальньох, кед ше пренайдзе професора руского язика, бо спомнута Школа нє може обезпечиц надополнєнє.
– Заинтересовани дзеци за годзини руского язика з рижних наших местох, котри у рижних штреднїх школох у Новим Садзе – єст. Маме и одредзене число дипломованих професорох руского язика за котрих знаме же су тераз нєзаняти – гварела Папуґова, визначуюци же школяром треба оможлївиц дополнююце усовершованє мацеринского язика после здобутого знаня у основней школи.
Годзини би ше отримовали раз до тижня у обєкту ТШ „Милева Марич Айнштайн” у Ґаґариновей улїци при автобускей станїци (у поради школярох и професора) и з тей нагоди Папуґова поволала шицких заинтересованих школярох за тоту наставу, алє и професорох котри би пристали робиц без надополнєня, най ше єй явя.
– Дружтво за руски язик и надалєй будзе писац вимоги Националному совиту Руснацох, Школскей управи и Покраїнскому секретарияту за образованє, же би у доглядним чаше вифинансовали тоту активносц. Вшелїяк, апелуєм на професорох котри чекаю на роботу, же би ше явели и почали робиц з тима школярами – гварела Ирина Папуґа, додаваюци же попри у Новим Садзе и Шидзе, потреби за факултативним виучованьом руского язика на штредньошколским уровню єст и у других местох, як цо Вербас и Кула, дзе єст наших школярох у рижних школох.