ВЕРБАС/РУСКИ КЕРЕСТУР – У Вербаше вчера отримане Першенство Войводини у катох и борбох за каратистох, на хторим вецей члени рускокерстурского Карате клубу Русин виборели пласман на державне змаганє, а каратистка Русину Сара Планчак на тим змаганю преглашена за найлєпшу у катеґориї „надїйох” у 2015. року у Карате Шотокан союзу, односно за найуспишнєйшого змагателя, понеже прешлого року скоро на шицких змаганьох дзе участвовала освойовала перше место.
На вчерайшим Першенстве Войводини участвовали коло 420 змагателє з 23-ох клубох, а за Русин у борбох перши места освоєли Мартина Рац и екипа у конкуренциї кадеткиньох. Екипу творели Сара Планчак, Мартина Рац, Анамария Няради и Кристина Катона.
Други места у борбох освоєли Анастазия Фаркаш у конкуренциї надїйох и Сара Планчак у конкуренциї кадетох, док треци места у борбох освоєли Теодор Няради у конкуренциї пионирох, Анамария Няради, Кристина Катона и Александар Гарди у катеґориї кадетох и Даниєл Кормош у катеґориї юниорох.
Треце место у Войводини у борбох освоєла и екипа пионирох Русину, хтору творели Андрей Дудаш, Теодор Няради и Ґлориян Штранґар, котри ше єдини змагал и у катох и освоєл 9. место спомедзи 34-ох змагательох.
Попри спомнутих, на державне першенство ше з освоєним шестим местом у борбох пласовала и юниорска екипа Русину, у хторей були Даниєл Кормош, Александар Гарди и Андрей Катона. Першенство Сербиї будзе 22. мая у Шабцу.