НОВИ САД – Покраїнски секретарият за енерґетику и минерални сировини розписал седем конкурси по хторих хасновательом безповратно буду додзелєни 174 милиони динари. Конкурси розписани з обласцох обновлївих жридлох енерґиї, енерґетскей ефикасносци, та унапредзеня знаня дзецох у предшколских и школских установох о тих темох, як и знаня о їх хаснованю у пракси.
Розписани конкурс за додзельованє поривох за софинансованє витворйованя проєктох применьованя цеплотних пумпох за зогриванє и хладзенє явних просторийох, потим за реализацию проєктох хаснованя соларней енерґиї за пририхтованє цеплей води у явних обєктох. Мож конкуровац и за финансованє проєкту рекултивациї напущених копальньох без титулара, а вредносци шицких трох конкурсох 30 милиони динари.
Нєвладовим орґанизацийом буду додзелєни 4 милиони динари за унапредзенє знаня предшколских дзецох и школярох основних школох о обласци енерґетики.
За софинансованє проєктох за убудовйованє котлох хтори маю вецей хасновитого дїйства до явних установох обезпечени 10 милиони динари, а за проєкти енерґетско- отримуюцих фармох 35 милиони динари. Безповратни средства ше додзелює ище и за проєкти хаснованя биомаси за продукцию цеплотней енерґиї у явних установох, за цо опредзелєне тиж 35 милиони динари.
Конкурси тирваю по 30. октобер, а вецей о нїх мож дознац на сайту www.psemr.vojvodina.gov.rs.