ВЕРБАС – У орґанизациї Националного совиту Руснацох, на ютре и поютре, 18. и 19. априла, будзе отримани акредитовани семинар за занятих у образовно-воспитних установох.
Семинар з назву „Як звекшац ефикасносц и мотивацию за роботу и ученє – рационално-емоцийни приступ” находзи ше у Каталоґу Педаґоґийного заводу Войводини за 2014/15. рок, ноши 24 боди, орґанизовани є за трицец учашнїкох, а будзе отримани у Готелу „Бачка” у Вербаше.
За семинар приявени виховательки у предшколских оддзелєньох на руским язику, учителє и наставнїки з основних школох у Руским Керестуре, Коцуре и Дюрдьове, дзе настава на руским язику порядна, як и зоз школох у Новим Садзе, Шидзе, Сримскей Митровици, Савиним Селу, Вербаше, Кули, Новим Орахове и штреднїх школох у Шидзе, дзе ше руски язик виучує факултативно, лєбо як виборни предмет.
На семинаре буду преподавац школски психолоґ, РЕБТ совитнїк и фамелийни психотерапеут Милена Опарница, занята у ОШ „Єлица Милованович” у Сопоту, школски психолоґ Марина Бунчич занята у ОШ „Милан Ракич” з Нового Беоґраду и специялиста клинїчней психолоґиї, РЕБТ терапеут Миряна Тркуля.
Семинар на ютре будзе отворени на 9 годзин, а заварти на нєдзелю на 15,30 годзин.