БЕОҐРАД – Представителє седем националних меншинох, министер просвити науки и технолоґийного розвою Сердян Вербич и директор Заводу за учебнїки Драґолюб Коїчич, вчера подписали спорозуменє по хторим у идуцим школским року буду обезпечени учебнїки хтори хибя на язикох меншинох. По овласценю предсидателя Националного совиту Руснацох (НС) Славка Раца, у мено нашого Совиту контракт у Беоґрадзе подписала членїца НС и предсидателька його одбору за образованє Мелания Римар.
Обезпечованє учебнїкох дефиноване у Акцийним планє за национални меншини у рамикох Поглавя 23, за цо обезпечени 134 милиони динари. Контракти подписали представителє рускей, словацкей, румунскей, мадярскей, горватскей, болгарскей и бошняцкей националней меншини, а на подписованю нє присуствовали представителє Националного совиту Албанцох. Як гварел министер Вербич, средства обезпечени и за учебнїки на албанским язику, та ше наздава же и представителє тей меншини подпишу контракт.
– Влада Сербиї обезпечела тото на цо ше чекало децениї, а то средства за друкованє учебнїкох на язикох националних меншинох, цо вельки крочай нє лєм за национални меншини, алє и за саму державу – гварел Вербич.
Министерство направело тройне спорозуменє з каждим националним совитом хтори ма цалосне образованє на своїм язику.