НОВИ САД – Город Нови Сад обезпечел 135 милиони динари за проєкти з обласци култури, а тот пенєж розподзелєни 189 новосадским здруженьом, дружтвом и поєдинцом. Пенєж за свойо проєкти достали и Завод за културу войводянских Руснацох, Руски културни центер и Дружтво за руски язик, литературу и културу.
Конкурс розписани же би ше мотивовало подзвигованє културней политики у Новим Садзе. По словох Тияни Делич, предсидательки комисиї хтора розпатрала прияви, проєкти було наисце вельо и за вельо векшу суму яку Город може обезпечиц, та вибрани проєкти хтори найбаржей допринєшу розвою култури у Новим Садзе.
Як найрепрезентативнєйши проєкти оценєни проєкти Матици сербскей, Сербского народного театру, Студентского културного центру, потим Фестивал улїчних гудацох, НОМУС, проєкт Здруженя гражданох „Класик рок“, Фондация Еґзит и проєкт Здруженя младих „Нове културне Населєнє“.
Цалосни список одобрених проєктох и суми од вчера мож опатриц на сайту Городу – www.novisad.rs
