Стан у защити културного скарбу Руснацох алармантни

автор саб
909 Опатрене

НОВИ САД – У Заводзе за културу войводянских Руснацох у Новим Садзе вчера отримана явна трибину з тему „Защита руского културного скарбу – резултати и перспективи”, на хторей о актуланим стану и приоритетох у тим значним сеґменту за чуванє националного идентитету бешедовали нашо водзаци фаховци у тей обласци.

Фахови сотруднїк беоґрадского Централного институту за конзервацию др Йоаким Стрибер на прикладзе керестурскей катедрали св. о. Миколая представел активносци на очуваню нєрухомих памятнїкох култури, кустос-музейни совитнїк у Музею Войводини Любица Отич бешедовала о защити етноґрафского скарбу, док др Янко Рамач, порядни професор на Филозофским факултету у Новим Садзе, акцентовал важносц друкованих памятнїкох култури, насампредз старих кнїжкох и рукописох на наших парихийних библиотекох.

Архивиста у Историйним архиву Зомбор Саша Сабадош нащивительо трибини упознал зоз законодавним рамиком у обласци очуваня културного скарбу и актуалнима трендами у тей сфери, а окреме наглашел важносц матичних кнїжкох, як шведкох о континуитету и демоґрафских рушаньох при Руснацох на тих просторох.

На трибини бешедовала и др Миряна Джекич, етнолоґ-конзерватор у Покраїнским заводзе за защиту памятнїкох култури, котра представела дотерашнї и будуци активносци на очуваню руских катеґоризованих памятнїкох култури, як цо то нашо церкви у Керестуре и Новим Садзе, Водица, Руски двор у Шидзе, Руска школа у Дюрдьове и найстарша хижа у Керестуре.

Предсидатель Вивершного одбору Националного совиту Руснацох Желько Ковач на трибини здогаднул же защита културного скарбу Руснацох прейґ националней библиотеки, архиву, музею и ґалериї важни сеґмент Националней стратеґиї, алє за успих у доходзеню до нїх необходне же би, попри фаховцох, у тим участвовала цала руска заєднїца.

Спатрени стан у шицких спомнутих обласцох указує же ситуация алармантна, гоч єст и винїмки. Нєрухоми памятнїки култури запущени, очкодовани, лєбо и девастовани, експонати у музейних збиркох ше нє чува адекватно, та велї препадаю, лєбо су и затрацени, а як проблем винєшене и же лєм часточно знаме цо єст „на терену”, та з тим и цо перше треба зачувац.

За винїмки у тей обласци заслужни ентузиясти – орґанизациї и поєдинци, як цо то Етно-клуб „Одняте од забуца” у Коцуре, лєбо „Руска одлога” у Дюрдьове и приватни збирки, а за правилни и системски приступ ґу тей обласци потребне вецей – фахови кадер, адекватна инфраструктура и обсяжна стабилна материялна потримовка.

На сходзе поведзени велї хасновити информациї, а як наглашел директор Заводу за културу ВР Серґей Тамаш, то лєм перша з вецей трибинох хтори Завод планує орґанизовац. На нїх буду винєшени и искуства других националних заєднїцох хтори нам можу буц хасновити.

ПОВЯЗАНИ ТЕКСТИ