НОВИ САД – Покраїнски секретарият за польопривреду, водопривреду и лєсарство розписал явну оглашку за одобрйованє и хаснованє стимулативних средствох за нєкомерциялни (старецки) реґистровани польопривредни ґаздовства хтори жем дали под аренду. Остатнї термин за посиланє приявох 15. май.
За пенєж можу конкуровац ношителє реґистрованого польопривредного ґаздовства, лєбо члени такого ґаздовства старши од 65 роки, котри власнїки жеми датей под аренду, найменєй пол, а найвецей 10 гектарох. Ґаздовство муши буц реґистроване и у тим року, а обнавянє реґистрованя, лєбо нове реґистрованє, тирва по 31. марец.
Можу конкуровац польопривредни пензионере, лєбо инвалидни польопривредни пензионере, алє нє и пензионере котри пензию витворели по даякей другей основи.
Условиє и же би контракт о даваню жеми под аренду на вецей роки нє бул заключени пред 2010. роком, а конкуровац нє можу ґаздовства котри жем под аренду дали членом свойого ґаздовства.
З буджету АП Войводини у тим року за тоту намену вєдно опредзелєни 140 милиони динари, а даватель под аренду може достац од 6 до 10 000 динари по гектаре, у зависносци од того кельо роки ма закупец. За доставанє найменшей суми – 6 000 дин. по гектаре, закупец нє шме буц старши од 60 роки, цо є младши, сума векша, а висина стимулациї завиши и од того чи ше жем дата под аренду гранїчи зоз жему того цо ю вжал под аренду.
Шицки потребни условия и документацию, як за тих котри перши раз дали жем под аренду, так и за тих котри уж доставали тоти стимулативни средства, мож найсц на сайту Покраїнского секретарияту за польопривреду – www.psp.vojvodina.gov.rs дзе ше пойдзе до мению „Конкурси/Явни оглашки”.