РУСКИ КЕРЕСТУР – Тих дньох у Доме култури Руски Керестур тирваю проби за наиходзаци програми на „Червеней ружи”, а внєдзелю, 19. юния, вєдно з Вельким народним оркестром Дому култури, пробу мали и млади шпиваче-аматере котри ше буду змагац за найкрасши глас.
Того року на змаганю за наступя 14 учашнїки з Дюрдьова, Коцура, Нового Саду, Сримскей Митровици, Суботици и Руского Керестура, з котрих ше за чобольов буду змагац троме леґинє, док за кошарку червених ружох и дзивоцку ладу аж єденац дзивки.
Концепция нєдзельовей програми того року будзе дакус иншака, понеже ше змагателє буду сами представяц публики прейґ знятих видео-прилогох, док у другей часци програми нє будзе змаганє нових композицийох у забавним духу, алє будзе отримани мини-концерт Златка Русковския з Керестура.
Програма на нєдзелю почнє на 20 годзин у Велькей сали Дома култури.