НОВИ САД – Покраїнски секретарият за польопривреду початком того тижня розпише нови конкурси, по хторих польопривреднїки годни достац рефундованя од 50 до 60 одсто од укладаньох.
Конкурсни линиї буду розписани за набавку системох и опреми за наводньованє, за набавку пластенїкох, за процивкаменцово мрежи у вецейрочних засадох, за опреманє хладзалньох, сушарох, потим за пчоларство и за набавку потребней опреми за фарми. За шицки конкурси наменєни 858 милиони динари.
Секретарият за польопривреду того року розпише и конкурси за финансованє роботи здруженьох, отримованє манифестацийох, отримованє и чисценє беґельох, а наявени и стимулациї старецким ґаздовством за даванє жеми под аренду.
– Жадаме стимуловац старацки ґаздовства най жем даю под аренду младим польопривреднїком, а сзимулациї буду од 6 000 до 10 000 динари по гектаре, у зависносци од того чи слово о сушедней парцели и од того чи тоти цо жем вжали под аренду младши, чи старши од 40 рокох – гварел ресорни секретар Бранислав Боґарошки.