СРИМ – На богослуженьох на Перши дзень Велькей ноци у наших церквох у Шидзе, Бачинцох, Беркасове и Бикичу пошвецени кошарки з пасками и пасхалним єдзеньом.
У Шидзе церква була полна з вирнима, окреме вельо було младих и дзеци, а парох о. Михайло Режак з тей нагоди пречитал Вельконоцну винчованку апостолского еґзарха за грекокатолїкох у Сербиї, кир Георгия Джуджара.
Торжествено було и у церквох у Беркасове и Бикичу, дзе Службу Божу служел и потим паски пошвецел парох о. Владимир Еделински Миколка.
Подобно було и у церкви у Бачинцох, дзе у присустве числених вирнїкох Службу Божу служел и кошарки пошвецал парох о. Дарко Рац.
Нєшка, на Други дзень швета у спомнутих церквох на службох будзе и мированє. Традицийно на Вельку ноц, вирни у наших сримских местох нащивюю гроби своїх найблїзших, та у Беркасове на 14, а у Бикичу на 15 годзин о. Владимир Еделински Миколка будзе благословиц гроби.
