СРИМСКА МИТРОВИЦА – На ютре у Сримскей Митровици будзе Дванасти Фестивал українскей култури „Калїна”. Програма будзе отримана у Високей школи фаховних студийох за васпитачох и дїловних информатичарох, а орґанизатор Фестивалу Национални совит українскей националней меншини у Сербиї, з технїчну потримовку домашнього КУД „Коломийка”.
Фестивал почнє на 16 годзин з отвераньом етно-вистави, а на 17 г. будзе концерт українских народних шпиванкох.
Од 18 до 19 г. будзе коштованє традицийних українских єдлох, а Фестивал будзе закончени зоз Шветочним концертом на 19 г., на хторим участвую УКЦ „Кобзар“ з Нового Саду, КУД „Иван Сенюк” з Кули, КПД „Карпати” з Вербасу, УКУД „Калїна” з Индїї и домашнї ДНУК „Коломейка”.
Госци Фестивалу Фолклорни ансамбл „Дивоцвит” и Ансамбл народней музики „Бревис” з України, та ансамбли „Млада надїя” з Румуниї, „Козак“ з Босни и Герцеговини и горватске УКУД „Иван Франко“.
Фестивал „Калїна” ше кажди рок отримує у другим месце дзе жию Українци у Сербиї, а треци раз у Сримскей Митровици.
Покровитель Город Сримска Митровица, а отримованє Фестивалу материялно помагаю Министерство култури и информованя и Покраїнски секретарият за културу и явне информованє.