НОВИ САД – У штерацец пиятим тогорочним чишлє новинох „Руске слово” рубрика „Тижньовнїк” дава звит зоз схадзки Националного совиту Руснацох, док „Нашо места” зазначую леґализованє нєзаконїто збудованих обєктох у жабельскей општини. Ту и звити зоз схадзкох скупштинох општинох Кула и Шид.
На бокох „Економиї” пише як ше одвива жатва жита у коцурским хотаре, а представене и ґаздовство Деяна Булатовича з Батровцох.
„Култура и просвита” анализує улогу кнїжки у нєшкайшим чаше, ту зазначене и означованє 20-рочнїци дюрдьовского Хору „Розанов”, а „Мозаїк” представя фотоґрафку Андреу Новак з Коцура.
Рубрика „Людзе, роки, живот” упознава читачох з фамелию Шян з Нового Саду, док „Духовни живот” понука огляднуце на 370-рочнїцу Ужгородскей униї.
Рубрика „Спорт” призначела и успих керестурскей столнотенисерки Софиї Ковач на турнире у Бечею, а у тим чишлє додаток „Руске слово у швеце”.