ДЮРДЬОВ – У рамикох Двацец другей Културней манифестациї „Костельникова єшень” у просторийох дюрдьовского КУД „Тарас Шевченко” всоботу, 14. новембра отримана музично-литературна програма на хторей представена найновша, седма кнїжка поезиї Агнети Бучко Папгаргаї „Осце и черешнї”.
Спред домашнього Дружтва присутних привитал дюрдьовски поета Яким Чапко, а о кнїжки Агнети Бучко Папгаргаї и значносци писаного слова и поезиї за чловека и його душу бешедовал одвичательни редактор Видавательного оддзелєня НВУ „Руске слово” Микола Шанта.
Попри авторки, котра пред кажду пречитану писню бешедовала и о єй наставаню, о поезиї Агнети Бучко Папгаргаї бешедовала критичарка Олена Планчак Сакач, котра гварела же ше єй поезия у нашей литератури находзи медзи оптимистичну Ирини Гарди Ковачевич и меланголичну Наталиї Канюх.
У музичней часци програми участвовала шпивачка Ана Римар, котра на вецей заводи одшпивала нашо шпиванки.
У рамикох того вечара заинтересовани могли купиц нашо литературни и музични виданя на штанду НВУ „Руске слово”, а по законченю урядовей часци, друженє госцох и домашнїх предлужене у просторийох дюрдьовского КУД.
