У РНТ пририхтованє новей представи, до конца януара конкурс за драмски тексти

автор зам
903 Опатрене

РУСКИ КЕРЕСТУР – Руски народни театер (РНТ) „Петро Ризнич Дядя” тих дньох пририхтує ище єдну представу за сезону 2014/15. року, чия премиєра ма буц 25. януара.

Штверо ґлумци – Янко и Нада Лендєрово и Юлин Медєши з Вербасу, та Танита Ходак з Коцура, з режисером Владимиром Надьом Ачимом у просторийох РНТ у Керестуре отримує проби представи „Як забиц предсидателя” Миру Ґаврана.

Друга премиєра у спомнутей сезони будзе витворена дзекуюци сновательови РНТ –  Националному совиту Руснацох, понеже на остатнєй схадзки з ребалансом свойого буджету опредзелєл 535 000 динари за наш национални театер.

На схадзки Управного одбору РНТ 23. децембра потвердзене же ше у театралней сезони 2015/16. до орґанох АП Войводини, як главного финансиєра Театру, будзе конкуровац за творенє двох представох – „Цо видзела послуга” Джоа Ортона, у режиї Владимира Надя Ачима и „Вона нє виновата” Йовґена Кочиша, у режиї Михайла Зазуляка.

Тиж так, УО РНТ здогадує наших авоторох же до 31. януара того року тирва заєднїцки конкурс РНТ, НВУ „Руске слово”, Заводу за културу войводянских Руснацох и Националного совиту Руснацох за нови драмски тексти на шлєбодну тему.

ПОВЯЗАНИ ТЕКСТИ