ШИД – Члени КУД Руснацох Осиєку внєдзелю, 6. новембра госцовали у Шидзе, на поволанку парохиї Преображеня Господнього, односно Старших шестрох у тей парохиї.
Госци перше присуствовали на Молебену у шидскей церкви, хтори служел парох о. Михайло Режак, котри и привитал госцох и упознал их з церкву и Лєтню владическу резиденцию.
Осиєчанє потим нащивели просториї Здруженя родичох за потримовку дзецом з окремнима потребами „Отворне шерцо“, як и обновени просториї дзецинкей заградки и други просториї у Резиденциї, а на концу пиньвицу дзе ше чува вино.
У културно-уметнїцкей програми, хтора отримана у Резиденциї, Осиєчанє ше представели з рускима народнима шпиванками, а свойо поетски твори читали Агнетка Балатинац, предсидателька КУД Руснацох Осиєку и Представителька Руснацох за Осиєцко-бараньску жупанию, и член Дружтва Томислав Мишир.
Як памятку на тото стретнуце Балатинцова домашнїм подаровала єден малюнок з Подобовей колониї хтору орґанизую Руснаци з Осиєку, а з тей нагоди отримана и кратка роботня вирабяня прикраскох з кукуричанки. Роботню отримали госцински Лела Дїтко и Блаженка Будимчич, а стретнуце предлужене и закончене з друженьом госцох и домашнїх.