НОВИ САД – Вчера, на Желєни штварток по юлиянским календаре, виронаучна ґрупа школярох пред вечаршу, Василийову Службу Божу, у грекокатолїцкей церкви св. апостолох Петра и Павла у Новим Садзе виведла кратку представу-пантомиму „Хресна драга”.
Дзеци вирним барз прешвечлїво приказали Исусово церпенє, ношенє крижу, паданє под нїм, розпинанє и умеранє на крижу. Провадзаци текст обезпечела и з анґлийского преложела часна шестра Георгия, котра вибрала и одвитуюцу музику, нашила костими и направела потребни реквизити, так же присутни у церкви наисце глїбоко дожили Калварию.
У „Хресней драги” участвовали дзеци Альоша Дюранїн, Лидия, Иван и Иґор Колбасово, Ана Монар, Фиона Грубеня, Каролина Гарди, Маша Джуджар, Мижо Ковач и Лука Вуячич, а пририхтали их їх вироучительки ш. Георгия и Мелания Римар.
