Центер за слуханє почина 16. новембра

автор маф
564 Опатрене

РУСКИ КЕРЕСТУР – Телефонски центер за слуханє „Нїтка” при Каритасу нашого Апостолского еґзархату почнє робиц 16. новембра, догварене на законченю обуки волонтерох отриманей у Керестуре всоботу, 24. октобра.

Друга, духовна часц обуки була о темох вязаних за роботу волонтерох у Центре, а викладали директор националного Каритасу о. Владислав Варґа и римокатолїцки парох з Бечею о. Ласло Поша.

На концу обуки 18 волонтере з вецей местох достали и одвитуюци сертификати, хтори им уручели вивершни директор Каритасу Апостолского еґзархату Янко Катона и координаторка Центру за слуханє, дипл. психолоґ Соня Виславски.

Центер за слуханє будзе робиц на принципе подполней анонимносци, будзе мац свойо телефонски линиї у Руским Керестуре и Новим Садзе, хтори буду отворени кажди дзень од 20 до 22 годзин, крем нєдзелї.

Годно ше явиц на руским, лєбо сербским язику, а пондзелками од 20 до 22 г. будзе отворена линия и у Ґорнїм Бреґу при Сенти, дзе ше годно явиц на сербским, лєбо мадярским язику. Пошвидко буду обявени и телефонски числа Центру.

ПОВЯЗАНИ ТЕКСТИ