БЕОҐРАД – Репрезентация школярох основней школи зоз транспорту, у чиєй екипи и Леонела Цифрич, школярка керестурскей Школи „Петро Кузмяк”, почала пририхтованя за Европске змаганє.
У екипи штверо найлєпши школяре – побиднїки державного змаганя отриманого у маю. Пририхтованя отримани од 23-30. авґуста у Беоґрадзе, були барз интензивни и тирвали по дзешец години дньово. Школяре ше за Евроспке змаганє маю пририхтац з обласци познаваня транспорта, з теорийней и практичней часци.
Окрем же ше мушели добре медзисобно упознац, як и зоз своїма селекторами, окремне дожице на пририхтованю им була нащива екипи державней телевизиї РТС, и же були на дочеку спортистох-олимпийцох зоз Риа.
Шицки штверо школяре пририхтованя предлужа у своїх школох зоз своїма наставнїками, аж по 22. септембер, односно по одход на змаганє. Школярку керестурскей Школи Леонелу Цифричову пририхтує наставнїк Зденко Шомодї.
Европске змаганє „Цо знаш о транспорту” будзе отримане концом септембра у Праги, у Ческей.