РУСКИ КЕРЕСТУР – Школски одбор Основней и штреднєй школи з домом школярох „Петро Кузмяк” вчера вечар за директора тей установи з тайним гласаньом єдногласно вибрал Хелену Пашо Павлович, дотерашню окончовательку длужносци директора Школи.
Дзевецчлени Школски одбор, на чолє з предсидательом Мирославом Надьом, директора виберал спомедзи трох кандидаткох котри конкуровали на розписани Конкурс за тоту фунцкцию, а попри Пашо Павловичовей, конкуровали ище Саня Тиркайла и Любица Няради, шицки заняти у керестурскей Школи.
Колектив, на схадзки Наставнїцкей ради преширеней з другима занятима у Школи прешлого пиятку з 55 гласами потримал Хелену Пашо Павлович. На тей схадзки Саня Тиркайла достала 15, а Любица Няради 10 гласи занятих у Школи.
О думаню колективу о кандидатох за директора, членох Школского одбору на вчерайшей схадзки поинформовал секретар Школи Михайло Надь, а потим ше Одбор з гласаньом опредзелєл за тайне гласанє, на хторим Хелена Пашо Павлович єдногласно вибрана за директора.
Понеже Школа „Петро Кузмяк” школа од окремного значеня за Руснацох и ма вецей одзелєня по руски як по сербски, согласносц на вибор директора тераз ма дац Национални совит Руснацох у чаше од 15 днї од доставаня вимоги од Школи. Цалосна документация о виборе потим будзе послата до Покраїнски секретарияту за образованє, хтори у чаше од 30 днї ма дац согласносц на вибор директора.
Як гварел секретар Школи Михайло Надь, кед ше Национални совит Руснацох и Покраїнски секретарият нє оглаша у предвидзених терминох, рахує ше же з тим дали свою согласносц на вибор Хелени Пашо Павлович за директора керестурскей Школи.
