ВЕРБАС – Того викенду у Вербаше отримани 37. Фестивал фолклорних традицийох Войводини, на хторим пияток наступели дзецински ансамбли, а соботу и нєдзелю ансамбли одроснутих, медзи нїма и штири ансамбли Руснацох.
На Фестивалє участвовали Дом култури Руски Керестур – його Дзивоцка и Хлопска шпивацка ґрупа, Тамбурови оркестер и Танєчна ґрупа ветеранох, док з Руского КУД „Др Гаврїл Костельнїк” з Кули участвовала Женска шпивацка ґрупа.
На Фестивалє участвовали и аматере КПД „Дюра Киш” зоз Шиду зоз двома шпивацкима ґрупами – Мишану младшу и Мишану старшу, як и Женска шпивацка ґрупа КУД „Петро Кузмяк” з Нового Орахова. Шицки нашо ансамбли на Фестивалє наступели вчера.
Попри спомнутих, на тото найвисше змаганє у обласци пестованя народней традициї пласовали ше и Женска жридлова шпивацка ґрупа керестурского Дому култури и Женска шпивацка ґрупа КУД „Жатва” з Коцура, алє нє наступели у Вербаше.
Вчера на Фестивалє була орґанизована и вистава виробкох старих ремеслох, та традицийних єдлох националних заєднїцох у Войводини, хтори були виложени на штандох опрез ЦФК.
Фестивал фолклорних традицийох Войводини орґанизовали Културни центер Вербас и Союз аматерох Войовдини, з финансийну потримовку Заводу за културу Войводини и Општини Вербас.
