МИКЛОШЕВЦИ – У миклошевскей Подручней школи ОШ Чаковци у Горватскей на ютре будзе отримане 21. Стретнуце руских основних и штреднїх школох.
На Стретнуце поволани школяре, наставнїки, професоре и директоре основних и штреднїх школох з местох дзе ше наставу орґанизує по руски и зоз школох у хторих ше руски язик виучує як виборни предмет з елементами националней култури у Сербиї и у Горватскей.
Стретнуце руских школох у Миклошевцох будзе отримане под покровительством Министерства науки, образованя и спорту Републики Горватскей, а у рамикох 165-рочнїци приселєня Руснацох до Миклошевцох.
Вєдно з домашню школу, Стретнуце орґанизує Дружтво за руски язик, литературу и културу з Нового Саду.