КОЦУР – Зоз Шветочну академию и провадзацима програмами хтори орґанизовала коцурска Основна школа „Братство-єдинство”, вчера означена 250-рочнїца образованя у Коцуре, источашнє и Дзень школи. Вєдно з терашнїм наставним кадром и школярами, значни ювилей означели и числени бувши школяре и наставнїки, як и визначни госци Школи.
У мено Министерства просвити на програми присуствовал началнїк Школскей управи Нови Сад Петар Видїкант, предсидатель Вивершного одбору Националного совиту Руснацох Желько Ковач, директор Заводу за културу войводянских Руснацох Серґей Тамаш, предсидатель Дружтва за руски язик, литературу и културу др Юлиян Рамач, представителє Општини Вербас, на чолє з предсидательом др Братиславом Кажичом, представителє других школох, здруженьох и други госци.
Шветочна академия отримана на поладнє у велькей сали Дому култури, за чийо пририхтованє була задлужена наставнїца сербского язика Ясминка Олич Илчешин. Програма була составена з трох часцох, на хторих з драмскима сличками приказане школство у Коцуре пред 250 роками, у терашньосци и яке би мало буц у блїзкей будучносци, зоз сучаснима методами образованя, а медзи тима цалосцами виводзени музични, лєбо рецитаторски точки.
Пред Академию, у физкултурней сали Школи отримане змаганє школярох у одбойки, у школским дворе подобова колония дзе дзеци, котри з темперами мальовали на шлєбодну тему, а познєйше присутни опатрелии виставу старих фотоґрафийох и наставних средствох у голу Школи, за чийо пририхтованє була задлужена наставнїца руского язика Снежана Шанта. На вистави виложене вельке число фотоґрафийох хтори шведочели о историяту коцурскей школи.
У школских учальньох з тей нагоди отворена и вистава малюнкох хтори намальовали бувши школяре коцурскей школи, як цо то Силвестер и Серафина Макайово, чийо малюнки були найчисленши, и велї други талантовани маляре. Тиж так, була пририхтана и вистава руских, сербских и мадярских народних єдлох, за хтору була задлужена учителька Миряна Бокан. Госци на дарунок достали по шерцо з медовнїка и малу кухарку з рецептами за лакотки хтори того дня пририхтани.
