НОВИ САД – Управа за капитални укладаня Войводини вчера розписала конкурс за софинансованє проєктох чий ношитель локална самоуправа, а медзи иншим, циль му и творенє вигодних условийох за поднїмательох и обезпечованє роботи. Окрем того, Управа отворела и конкурс за финансованє и софинансованє проєктох за унапредзенє образованя на шицких уровньох.
За кажди конкурс опредзелєни по 200 милиони динари, а мож апликовац по 13. май. Окрем за проєкти хтори доприноша розвою малих и штреднїх подприємствох, локални самоуправи можу конкуровац и за пориви за проєкти вибудови, добудови, реконструкциї, санациї, адаптациї, та проєктованя индустрийних и роботних зонох.
Установи за основне, штреднє и високе образованє можу конкуровац за унапредзенє и модернизованє инфраструктури, односно за проєкти вибудови, добудови, реконструкциї, адаптациї и санациї обєктох.
Вецей информациї о конкурсох мож опатриц на линку www.vojvodina.gov.rs/sr/dokumenta/konkursi.