БАЧИНЦИ – Священїки и вирни вчера шветочно зоз двонєньом дзвонох и крижами привитали приношенє икони Пресвятей Мацери Божей Водицовей до церкви Святого апостола и євангелисти Луки, хтори принєсли вирни зоз Суботици и Руского Керестура, а присуствовали и шестри Служебнїци и вирни зоз Беркасова и Бикичу.
Шветочну Службу Божу предводзел о. Владимир Еделински Миколка, парох зоз Беркасова у сослуженю домашнього пароха о. Дарка Раца хтори и наказовал.
О. Рац наказовал о Мацери Божей и єй значносци у живоце каждого християна, а тиж визначел и значносц Водицового святилїща за Руснацох.
Виронаучни дзеци гуторели писньочки пошвецени Мацери Божей, а потим служени Молебен.
По словох парох о. Дарка Раца, икона у бачинскей церкви будзе виложена наступни два тижнї, церква будзе отворена за вирних же би ше модлєли при икони, а стредами и пиятками буду служени Молебени.
Вирни зоз Бачинцох потим икону Мацери Божей Водицовей однєшу до нашей грекокатолїцкей церкви до Нового Саду.