РУСКИ КЕРЕСТУР – З нагоди законченя школского року, вчера вечар у Велькей сали керестурского Дому култури отримани Концерт школярох Школи за основне музичне образованє (ШОМО) з Кули, на хторим найвецей участвовали школяре єй Оддзелєня у Руским Керестуре.
Директорка Школи Лїляна Барна Никитович здогадла на значни подїї за Школу у прешлим школским року, як цо то 50-рочнїца роботи ШОМО, пременка руководительства, одход до пензиї двох наставнїкох – Ирини Олеяр и Ласла Берка, а Школа першираз була домашня Войводянскому фестивалу тамбури.
Директорка представела и тогорочни успихи школярох на рижних змаганьох, од покраїнского по интернационални уровень, дзе ше вкупно змагали 16 школяре и освоєли 24 награди, з чого 9 перши, 10 други и 5 треци.
Медзи нїма и шесцеро порядни и єден позарядови школяр з керестурского Оддзелєня – Леон Юрич, I класа на кларинету, котри освоєл другу награду, Иґор Папуґа, II класа тамбури-прим, котри освоєл першу награду, Матей Катрина, III класа на тамбури бас-прим, тиж освоєл першу награду, Михайло Рацпети, III класа клавиру, котри освоєл першу награду, Ивана Планчак IV класа клавири, котра освоєла другу награду, Данило Йованович, III класа гармоники, котри освоєл першу и Таня Надь, VI класа тамбури-прим, котра освоєла другу награду. Директорка Школи им вчера вечар уручела и окремни припознаня и дарунки за їх успих.
На вчерайшим концерту школяре ШОМО наступели у 28 точкох як солисти, дуети и оркестри на инструментох хтори виучую.
