9. ЯНУАР – На нєшкайши дзень народзени познати уметнїки як цо то Стеван Мокраняц, Карел Чапек и Сергий Йосипович Параджанов, а основане и єдно нашо Културно-просвитне дружтво у Сриме.
1856 – Народзени сербски композитор и музични педаґоґ Стеван Стоянович Мокраняц (Неґотин, 9. януар 1856 – Скопє, 28. септембер 1914), бул член Сербскей кральовскей академиї, хороводитель Беоґрадского шпивацкого дружтва, снователь Сербскей музичней школи и Беоґрадского смикового квартету. У композицийох обрабял и повязовал народни шпиванки зоз чого вишли Руковети.
1890. року народзени чески писатель Карел Чапек (Мали Сватоньовици, 9. януар 1890 – Прага, 25. децембер 1938), писал драми, приповедки, романи, есеї, а бул и драгописатель и новинар. Зазначене же перши похасновал слово робот у драми Р. У. Р (Rossumovi Univerzální Roboti).
1924 – Народзени Сергий Йосипович Параджанов (Тбилиси, Ґрузия, СССР, 9. януар 1924 – 20. юлий 1990, Єреван, Єрмения, СССР), єрменски, українски и совєтски филмиски режисер, сценариста и композитор. Познати по филму „Цинї забутих предкох” (укр. Тіні забутих предків, анґл. Shadows of Forgotten Ancestors, або Wild Horses of Fire), каласика совєтского бунтового поетичночо жанру и филму котри преславел народни обичаї на українских горох Карпатох, насампердз гуцулски обичаї. „Цинї забутих предкох” робени по приповедки познатого українского писателя Михайла Коцюбинского, а окрем того филму Параджанов познати и по насловох „Києвски фрески”, „Ашик-Кериб”, „Леґенда о Сурамскей тврдинї” и други. Пре шлєбоду уметнїцкого виразу, совєтска власц репресовала Параджанова.
1946 – У Бикич Долу, основана филияла Рускей матки, на инициятиву учителя Михайла Ковача, чий предсидатель бул Мишко Митров, секретар бул учитель Михайло Ковач, а касу водзел Емил Гнатко. У рамикох того Дружтва, основани и мишани хор и аматерски театер. Од 5. марца 2011. року Дружтво реґистроване як Културно-просвитне дружтво „Иван Котляревски”.
