25. ЯНУАР – На нєшкайши дзень народзел ше о. Йоаким Холошняй протоєрей ставрофор и вельорочни дюрдьовски парох.
1904 – Вишло перше число дньових новинох „Политика”, хтори основал Владислав Рибникар и бул їх перши редактор.
1924 – У французким городзе Шамони почали перши жимски Олимпийски бависка.
1932. Народзени о. Йоаким Холошняй (Руски Керестур, 25. януар 1932 – Дюрдьов, 19. марец 2017), священїк, писатель, музичар, дюрдьовски парох, протоєрей ставрофор, бачки декан, руски културни дїяч. Ґимназию закончел у Вербаше, бул питомец Грекокатолїцкей семинариї у Заґребе, а за священїка є рукоположени 1958. року. Службовал у Печну, Ґрабру, Прибичу, у Миклошевцох и у Берку. За управителя парохиї у Дюрдьове бул меновани 1971. року, од 1979. року бул и декан бачки, а управял и з парохию у Ґосподїнцох. За протопрезвитера бачкого меновани є 1979. року. Од 1999. р. та по 2003. рок окончовал длужносц епископского викара. Попри тим, о. Йоаким Холошняй остал запаметани як позарядови интерпретатор церковного шпиваня, мал красни тенор и шпивал у Церковним хору Розанов. Пририхтал и обявел, зоз Марию Холошняй музичну антолоґию карпатского простопинїя, Зборнїк вибраних писньох зоз Саночного, Служби Божей и Парастасу карпаторуского богослужебного розшпиву (1996). Окрем священїцкей роботи, бул активни и на других подручох, мал значну улогу у снованю Рускей одлоги (музейней збирки) у Дюрдьове. О. Йоаким Холошняй протоєрей ставрофор и вельорочни дюрдьовски парох, умар 19. марца 2017. року у Дюрдьове у 86. року живота. Поховани є на дюрдьовском теметове.
1981 – Народзени македонски шпивач, текстописатель и композитор Тодор Проески (Прилеп, 25. януар 1981 – Нова Ґрадишка, 16. октобер 2007), познати як Тоше Проески. Бул популарни у жемох юговосточней Европи. Настрадал у транспортним нєщесцу на автодраги Бреґана–Липовац при Новей Ґрадишки.