ПРЕШОВ/БРАТИСЛАВА (СЛОВАЦКА РЕПУБЛИКА) – Русини у Словацкей 2025. року означую 30 роки кодификациї русинского язика. У октобре 2024. року Округли стол Русинох Словацкей (ОСРС) преглашел 2025. рок за Рок русинского язика, гвари ше у сообщеню ОСРС.
У Декларациї о прeслави кодификациї русинского язика, хтора принєшена у Братислави 27. януара 1995. року, медзи иншим, пише: „Русини у Словацкей длуго нє могли официйно хасновац мацерински язик, развивац го и привесц на таки уровень же би го дзеци учели у школох, же би ше на нїм обявйовало новини, часописи и кнїжки, же би ше го слухало на радию и телевизиї, у русинским театре итд. Векша часц Русинох административно нє прилапели українски як свой мацерински язик. Од нєшка русински язик постава литературни язик Русинох у Словацкей“.
Так 27. януар 1995. року постал историйне заобраценє хторе потвердзело ориґиналносц и змоцнєло еманципацию Русинох. Дзекуюци кодификациї нєшка русински язик то язик театра, новинох, модийох, хаснує ше го на вирским плану, Русини маю свой радио, телевизию, институт на Универзитету у Прешове и русински язик ма свойо место у образовним процесу у школох.
З другого боку, ОСРС свидоми же резултати на попису жительства з 2021. року потвердзую неґативни тренди, гоч звекшане число державянох Републики Словацкей (РС).
Прето руска платформа одлучела же у року кед ше означує рочнїцу кодификациї, орґанизациї членїци ОСРС и партнере на рижни способи означа рочнїцу, а циль унапрямиц означованє рочнїци и на промоцию русинского язика и знука русинскей заєднїци и директно, алє на других гражданох СР.
Представнїки ОСРС и партнере платформи означа рочнїцу 27. януара пополадню при спомин-плочи у Братислави, на месце дзе пред 30 роками вигласана кодификация.
На пияток 24. януара у Прешове у Театру Александра Духновича отрима ше шветочну академию, хтору рихта Русинска оброда у Словацкей. Тота орґанизация, праве и була инициятор и найзаслужнєйша є за кодификацию русинского язика у Словацкей. На академиї наступя и уметнїки зоз Театру Александра Духновича и Поддуклянска уметнїцка фолклорна ґрупа.
Словацки народни музей – Музей русинскей култури у Прешове 30. януара рихта фахови сход зоз назву Як далєй зоз русинским язиком?, хтора наменєна тим цо ше професийно занїмаю зоз русинским язиком.
Теми о русинским язику и о рочнїци кодификациї през рок буду и на програмох на словацкей телевизиї и радию, точнєйше на Радио Патриа – Национално-етнїчне емитованє у Кошицох. Перша розправа о кодификациї заказана у фебруаре. Того року и други русински медиї, як цо то Русин ФМ, двотижньови НН инфо Русин и часопис Русин, тиж зоз своїма змистами означа Рок русинского язика.
Основна школа и предшколски установи на мацеринским язику у Кленови пририхтую у маю манифестацию пошвецену рочнїци кодификациї.
У септембре у Прешове будзе 5. медзинародни конґрес русинского язика, хтори орґанизує Институт за русински язик и културу при Прешовским универзитету. Праве перша така конференция, отримана 1992. године у Бардейовских Купельох, започала процес кодификациї у Словацкей, а познєйше и у Польскей и Мадярскей. Источашнє зоз русинску конференцию, рихта ше и 1. конференция младих Карпаторусинох.
Русинска оброда у Словацкей пририхтує и науково-практичну конференцию наволану Русински язик у Словацкей у пракси.
Здруженє гражданох Лабирски Русини планує преподаваня у основних школох у округу Медзилаборци, на хторе ше повола академцох, виглєдовачох и особи хтори допринєсли розвою русинского язика у остатнїх 30 рокох. Тота орґанизация рихта и Шветочну академию у Чертижним, на хтору буду поволани значни особи русинскей култури, писателє, редакторе, новинаре, члени водзацих русинских орґанизацийох.
Рок русинского язика будзе пошвецени и другим збуваньом хтори орґанизациї членїци ОСРС и партнере реализую на яр, як цо то змаганє у рецитованю, русински фестивал у Свиднїку, Малим Липнику, Баєривциї, Вличу, Кошицох, та и Камп з младима по русински.
ОСРС трима же ше през активносци у тим року ювилея подзвигнє свидомосц о їх язику и спомалши процес його нєставаня.