ЖАБЕЛЬ – Спортски союз општини Жабель додзелєл рочни награди найуспишнєйшим спортистом, спортским екипом, тренером, фаховцом и спортским роботнїком зоз териториї општини.
Награду за найуспишнєйшого спортисту достал Предраґ Вуйков зоз РК „Гайдук” Чуроґ, а награду за найусписнєйшу спортискиню достала Теодора Нєґован зоз ОК „Жабель Волей”. Найуспишнєйши спортисти младших катеґорийох то Слободан Милошевич зоз Ґосподїнцох и Марина Мушицки зоз Дюрдьова.
Найлєпши спортски екипи то ОК „Жабель Волей” и ФК „Бачка 1923” Дюрдьов, а награду за найлєпшого тренера достал Миодраґ Бабич зоз КК „Дифенс”. За доприношенє у афирмациї спорту през роботу у спорту, роботу зоз младима и спортскима орґанизациями и форумами наградзени Урош Боґоєвич, а награду за животне дїло достал Лазар Чонкич.
Награду достали и орґанизаторе найлєпшей спортскей акциї, хтора зоз своїм цильом, масовносцу и зоз посцигнутима резултатами спонукує популаризацию спорта и здравя, а то „Спортски бависка младих Сербиї 2024”. За доприношенє розвою спорту и очуваню спортскей традициї наградзени Милорад Краґуль зоз РК „ЖСК 1955” Жабель.
З тей нагоди, предсидатель општини Урош Раданович поздравел спортистох и гварел же локална самоуправа вше будзе ту за шицки їх питаня, предклади, як и за помоц кеди ґод им будзе нєобходна.
Предсидатель Спортского союзу општини Жабель Марко Милетич и член Општинскей ради за спорт Зоран Шолая винчовали наградзеним и визначели же и у будуце буду давац потримовку и мотивацию за ище векши успихи.