ВЕРБАС – З нагоди 25-рочнїци Културно-просвитного дружтва (КПД) „Карпати” у Вербаше вчера отримана Шветочна скупштина, на хторей присуствовали члени, активисти, приятелє и спонзоре Дружтва.
Пред Скупштину отримани Главни одбор Дружтва, а пред Шветочну отримана роботна часц Скупштини, на хторей розпатрани Звит о роботи Дружтва медзи двома схадзками, Звит Надпатраюцого одбору и финансийни звит.
На Шветочней часци схадзки шицки бувши предсидателє КПД достали плакети, як найвисше припознанє Дружтва. Плакети достали Звонко Сабо, Янко Лендєр, Михайло Кузма, Ярослав Комбиль, Владимир Папуґа и Славко Микитишин.
У просторийох „Карпатох” вчера вечар були велї бувши и терашнї члени, и на тот способ дали чесц шицким котри участвовали у твореню и роботи Дружтва.
З тей нагоди предсидатель КПД Деян Загорянски наглашел же то значни ювилей за шицких членох и активистох котри свою роботу убудовали до Дружтва, на чим им окреме подзековал. На шветочносци присуствовали и парохове вербаских грекокатолїцких парохийох о. Алексий Гудак и о. Иґор Вовк
З двома пригоднима шпиванками шветочносц збогацел и Хор Дружтва, а потим орґанизована вечера и друженє.
