РУСКИ КЕРЕСТУР – У Майсторским доме у Руским Керестуре внєдзелю, 4. януара, отримана уж 181. рочна Скупштина Здруженя ремеселїнкох и приватних поднїмательох Керестура, на хторей того року присуствовало красне число привреднїкох, медзи нїма и коло 10 младши власнїки фирмох.
Присутних привитал предсидатель Здруженя Владимир Емейди, а Скупштина почала з минуту цихосци за покойних членох медзи двома схадзками. Звит о поробеним у прешлим року поднєсол подпредсидатель Здруженя Михайло Семан Петрашков, у хторим визначена прешлорочна преслава 180-рочнїци роботи Здруженя, з часци пооправяни Майсторски дом, отримани Майсторски бал и Майсторска Служба, орґанизовани вецей акциї, участвовало ше на конкурсох з проєктами, на преподаваньох и обукох, а єден з векших проєктох бул и Керестурски саям под час „Червеней ружи”.
Визначене сотруднїцтво зоз шицкима орґанизациями у валалє, алє и у кулскей општини, окреме з Общим здруженьом поднїмательох кулскей општини и Аґенцию за розвой Општини Кула, з хтору тераз тирва правенє ґеоґрафскей бази податкох о шлєбодних просторох за видаванє за даяку привредну дїялносц, так же и шицки Керестурци поволани най таки простор приявя до Здруженя, лєбо до Аґенциї за розвой.
На Скупштини присуствовали и помоцнїк предсидателя Општини Кула Владан Кртолица, директор Аґенциї за розвой Општини Кула Никола Жежель, предсидатель Общого здруженя поднїмательох кулскей општини Сувеиль Кариманович, як и Драґан Стеванович спред Реґионалней привредней комори Зомбор.
Кариманович керестурских поднїмательох поволал же би сотрудзовали и свойо проблеми у роботи прешлїдзовали до нєдавно основаней Канцелариї за поднїмательох при Покраїнскей влади, а зоз Скупштини предсидательови Општини Кула будзе послати допис же би превипитал одлуку о порциї на маєток, як и о висини плаценя комуналийох за фирми.
На схадзки одлучене же рочна членарина будзе 250 динари, а привреднїки, як и шицки заинтересовани Керестурци, повлани же би пришли на традицийни Майсторски бал, хтори будзе 24. януара у Ресторанє „Червена ружа”.
