НОВИ САД – У просторийох НВУ „Руске слово” у Новим Садзе, на адреси Футожска 2 (треци поверх) отворена вистава „История Новинско-видавательней установи ‘Руске слово’ през 24 заглавя: РУСКЕ СЛОВО – ВИК ЯК КЛЇПНУЦЕ”, з нагоди 100-рочнїци друкованого новинарства по руски, 80-рочнїци НВУ „Руске слово” и 20-рочнїци Новинскей аґенциї „Рутенпрес”.
Слово о ґалериї насловних бокох и лоґоох, зарамикованих и хронолоґийно пошоровних од першого числа „Руского календару”, котре вишло 1920. року и чарно-билих виданьох „Руских новинох” и „Руского слова”, та по сучасни публикациї у фарбох.
Вистава представена на трох язикох, заглавя у рамох на мурох по руски, а каталоґ-брошурка по сербски и анґлийски
Простор „Руске слово” у Новим Садзе физично погодни за таку ґалерию, прето же твори заварти круг просторийох. При селекциї ґалериї нє бул пресудни естетски, алє моменти историї пременкох и розвою виданьох установи „Руске слово”, представени у дружтвено-политичним контексту.
Ґалерия историї наших виданьох и брошура доступна и отворена за шицких заинтересованих нащивительох, сотруднїкох, госцох и муштериї котри приходза до НВУ „Руске слово”.