НОВИ САД – Новоформована ґрупа Уприступачиванє у сотруднїцтве зоз Новим културним населєньом внєдзелю, 6. септембра у центре городу отримала акцию през инсталацию наволану Уприступачи се.
Инсталация, односно жовти инвалидски кочики и виписани особни порученя були на вецей местох на Площи шлєбоди у центре городу, зоз чим ше указало на препреченя зоз хторима ше каждодньово зочую особи зоз инвалидитетом.
Зоз таку акцию ґрупа Уприступачиванє жада поволац гражданох до заєднїцкей инициятиви же би ше указало на рижни физични препреченя, як цо то ґарадичи, орубенци, банкини, будинки без лифтох, рижни нєприступни простори и подобне. Тиж ше жада и указац на рижни файти нєприступносци, нє лєм на архитектонски препреченє, алє и на повязованє заєднїци же би ше простори обдумовало так же би одвитовали потребом шицких гражданох.
