КАРАВУКОВО – Фодбалски клуб Полет зоз Каравукова бул домашнї штвартого Полет купа, традицийного медзинароного турниру младших катеґорийох, хтори отримани 5. и 6. септембра, а медзи учашнїками бул и ФК Русин зоз Руского Керестура, чийо фодбалере посцигли одлични резултати и турнир закончели на високим другим месце.
На тогорочним турниру участвовали 64 екипи подзелєни до штирох возростних катеґорийох, та перши дзень турниру наступели ґенерациї 2014. и 2016, кед бавели и млади русиновци, док шлїдуюцого дня наступели ґенерациї дзецох 2015. и 2018. рок.
Русин у ґрупней фази перше поражени од домашнєй екипи Полет зоз Каравукова, зоз 1:0, а потим звладал екипу Омладинац зоз Дироня зоз 4:0. У одлучуюцим стретнуцу процив екипи Соко зоз Новей Ґайдобри, Керестурци славели прешвечлїву побиду зоз 6:0.
У штварцини финала Русин звладал Младосц зоз Апатину зоз резултатом 5:2, а потим у полуфиналу одбавел тварди дуел процив екипи Спартак А зоз Суботици з резултатом 2:1. У финалу Русин бавел процив екипи Спартак Б зоз Суботици, хтора славела зоз резултатом 4:0.
За Русин наступели – Страхиня Кршич, Давид Гарди, Дориян Попович, Михайло Шомодї, Андрей Чизмар, Иґор Няради, Стефан Такач, Лука Тасич, Павле Виславски, Стефан Зорч, Иван Чапко, Тадей Сеґеди и Деян Шимко. Бавячох на Турнир водзел їх тренер, Зденко Шомодї.
