ЖАБЕЛЬ – Внєдзелю 20. септембра закончени дводньови „Beer fest” у Жаблю, котри орґанизовани по штварти раз, а три роки за шором, пред тим ношел мено Фестивал ремеселнїцкого пива „Крафт фест” (Craft fest).
Того року на Фестивалу промововани шейсц пивари и єднo Здруженє „Клуб пиварох” зоз Нового Саду, чий предсидатель Иґор Вапенски служел и толковал шицким заинтересованим яки пива понукаю, а у понукнуцу мали осем пива з рижнима смаками.
„Beer fest” всоботу, 19. септембра отворел Урош Раданович, предсидатель Општини Жабель и Серґей Запорожец, директор Туристичней орґанизациї општини Жабель, котри гварел же перши вечар фестивал нащивели три и пол тисячи гражданє.
Попри деґустациї пива, фестивал и того року понукнул и забавни змисти, односно музичну програму у котрей за два вечари наступели три бенди и єдна шпивачка. Перши дзень, всоботу, 19. септембра наступел „Амадеус бенд”, а пред нїм бенд „Madona tribute”. Другого дня фестивалу, внєдзелю 20. септембра, наступела шпивачка Ивана Селаков, а скорей нєй наступел бенд „Отказни рок”.