Предвиберанкова кампаня за парламентарни виберанки була наисце динамична, полна зоз информациями, точнима и фалшивима, медзисобнима обвиньованями. На политичней сцени наступаю 18 лїстини, з котрих велї маю свойо политични активносци лєм на виберанкох.
Пред виберачами були рижнородни активносци, штанди, кампаня од дзеврох до дзеверох, зволованє на телефони, подписованє и даванє такв. „сиґурних гласох”, митинґи, протести, и велї сходи, дзелєнє дарункох, вешеля и вечери за своїх симпатизерох, и числени обецунки. Углавним, на сходох гражданє могли видзиц, мож повесц и преказованє моци и сили, же чий сход будзе екстраваґантнєйши. Важне же би медиї професийно робели свою роботу, же би шицки предвиберанково активносци були ясно означени, алє и же би шицки учашнїки були ровноправно заступени и же би пласовали лєм правдиви и преверени информациї, бо праве тото публика обчекує од медийох.
Реґулаторне цело за електронски медиї (РЕМ), после длугшого часу нєпорозуменьох, оформене уж у виберанковей кампанї, 22. септембра, аж на штвартей конститутивней схадзки. Мож заключиц же догварку о тим хто будзе предсидатель нє могли посцигнуц осмеро члени – Дубравка Валич Неделькович, Ира Проданов Країшник, Милева Малешич, Родолюб Шабич, Милош Ґарич, Милан Петкович, Снежана Милькович, и Стевица Смедеревац котри вибрани за предсидателя. У составе РЕМ-у хиби член котрого предкладаю национални совити националних меншинох.
Улога РЕМ-у окреме значна док тирва предвиберанкова кампаня, а то визначели и члени, же праве зоз конституованьом и вибором предсидателя потвердзели значносц того Цела. Мониторинґ електронских медийох вочи парламентарних виберанкох облапял 11 телевизийни програми, медзитим, роботу РЕМ-а у тей предвиберанковей кампанї означели и почежкосци у приношеню одлукох. Совит РЕМ-а нє посцигнул догварку же би ше преширело лїстину медийох котри буду под надпатрунком, та дзепоєдни програми остали звонка тей системи.
З оглядом на тото же способ на котри телевизиї информую о политичних актерох може уплївовац на информованосц гласачох и їх можлївосц же би розлични понуканя спатрели на основи релевантних информацийох, мониторинґ телевизийних програмох значни фактор.
Таки збуваня ознова отворели питанє ефикасносци и кредибилитету того Совиту, и його способносци же би реаґовал благочасово на обачени нєправилносци. Док, запровадзованє мониторинґу нєдостаточне кед исти тоти резултати нє доступни явносци, и кед виостанє реакция на потенциялни потупеня. Гласачом важне же би мали приступ ґу превереним информацийом и же би верели до виберанкового процесу, а за тото важне же би надпатрунок медийох бул транспарентни, дошлїдни и засновани на єднаких правилох за шицких учашнїкох.