ДЮРДЬОВ – Вчера у просторийох Фодбалского клубу (ФК) „Бачка 1923” у Дюрдьове отримана порядна Рочна скупштина Клубу, на хторей присуствовали члени Клубу, його Управного одбору, любителє спорту з валалу и представителє Месней заєднїци (МЗ) Дюрдьов.
Присутних привитал предсидатель Скупштини Милош Шовлянски, а звит о поробеним у прешлим року и планох за тот рок поднєсол предсидатель Управного одбору и Клубу Мирко Тривунович. Вон визначел же ше прешлого року поряднє робело, а того року перши тим планує вибориц пласман до висшого ранґу змаганя. Тривунович визначел и же Клуб нє ма длуства, а кед же того року достаню векшу финансийну помоц, планую ушориц зоблєкальнї и направиц трибину на стадионє.
На Скупштини пречитани и звити о роботи шицких возросних ґрупох фодбалерох „Бачки”, хтори поднєсли їх тренере, а виношаци финансийни звит, секретар Клубу Драґан Римски подзековал и шицким спонзором на помоци значней за роботу ФК.
Понеже Чеда Матич и Недя Яковлєвич задзековали на членство у Управним одборе, на їх места вибрани Никола Тртич и Драґан Вуйович.
На Скупштини присуствовала предсидателька Совиту МЗ Дюрдьов Леона Виславски, котра обецала же до конца єй мандату, у авґусту, Клуб од МЗ достанє медзи 20 и 30 000 динари.
