НОВИ САД – У просторийох Завода за културу войводянских Руснацох, вчера, 1. новембра, отримана схадзка Вивершного одбору (ВО) Националного совиту (НС) Руснацох .
На схадзки, хторей присуствовали шицки члени ВО, принєшени вецей значни одлуки хтори буду тема наиходзацей схадзки НС. Насампредз, принєшене Предкладанє одлуки за вибор директора Завода за културу войводянских Руснацох и прилапени вименки Финасийного плану Националного совиту Руснацох за 2017. рок.
На схадзки предложена и одлука о снованю Фондациї, як и предклад о менованю членох Управного одбору Фондациї. Принєшени и одлуки о розришеню и менованю нових членох Одбору за информованє, даваню потримовки проєктному тиму П.Р.О.М.О.Т.Е.Р. и о намени средствох достатих у судским поступку.
Члени одбору почали инициялну розправу о молби Комисиї за даванє менох улїцох, площох и других часцох Городу Нови Сад, а позитивно оценєли лїстину представнїкох локалней самоуправи за членох школских одборох у основних школох у општини Вербас.
На наступней схадзки НС на дньовим шоре би тербали буц и точки хтори ше одноша на реализацию проєкту будинку Завода за културу войводянских Руснацох у улїци Матици Сербскей у Новим Садзе и на скарб хтори остал за нашим публицистом и новинаром Мироном Жирошом.
Схадзка НС Руснацох заказана за 7. новембер у Руским Керестуре.