БЕОҐРАД – Адвокатска комора Сербиї (АКС) на Скупштини отриманей 2. фебруара застановела роботу адвокатох, членох АКС од 3. фебруара. Претаргнуце роботи будзе тирвац 30 днї, по 4. марец зоз окончованьом минимума обовязкох, пише у сообщеню на сайту АКС.
Адвокатска комора Сербиї прилапела предкладанє Управного одбору Адвокатскей комори Шабац, одлуку же би ше на 30 днї застановело роботу. Шабацки адвокати предложели же би ше запровадзело минимум у процесу роботи хтори нєобходни за защиту основних правох и интересох клиєнтох, так же адвокати нє буду уходзиц и пребувац у просторийох суду, тужительства, полициї и орґанох управи по було якей основи.
Дружтво судийох Сербиї (ДСС) ше нє придружело застановйованю роботи зоз сообщеньом у хторим, медзи иншим, стої же „Нє приводзаци до питаня индивидуалне право каждого граждана, уключуюци и судиї, же би виражели становиско о случованьох у держави, Дружтво судийох Сербиї, як професийне здруженє судийох, указує же судска власц, у ситуациї виражених дружтвених и политичних подзелєньох, нєцерпезлївосци и нєтолеранциї, треба же би ше воздзвигла понад шицки опредзельованя и же би моцнєню правней держави и владавини права першенствено допринєсла зоз каждодньову совисну, принципиєлну, нєзависну роботу и одлуками, у складзе зоз Уставом и законами и у мено народу, гоч кельо народ у одредзених хвилькох подзелєни”, пише у сообщеню ДСС.