Безконєчни танєц сучасней уметнїци Наталиї Рибович (фото)

автор В. Вуячич, Фото Т. Рибович
419 Опатрене

БЕРЛИН (СОЮЗНА РЕПУБЛИКА НЄМЕЦКА) – Вистава „Infinito Dance” сучасней уметнїци Наталиї Рибович, отворена пияток, 22. септембра у Амбасади Републики Сербиї (Taubertstr.18) у Берлину.

Виставу орґанизовала амбасада Републики Сербиї у Союзней Републики Нємецкей знагоди 140-рочнїци од подписованя Тарґовинского контракта и Конзуларней конвенциї медзи Сербию и Нємецку же би ше представело моцни медзилюдски вязи у рижних обласцох сотруднїцтва.

У програми отвераня вистави участвовали амбасадорка Републики Сербиї у Союзней Републики Нємецкей др Снежана Янкович, управнїца Ґалериї Матици сербскей у Новом Садзе др Тияна Палковлєвич Буґарски и авторка уметнїца Наталия Рибович.

По словох сучасней уметнїци Наталиї Рибович вистава була цалосц зоз приказаним артом и нащивителями, шицко вєдно творело „Безконєчни танєц” (Infinito Dance).

Виставу мож опатриц од 22. септембра по 23. октобер, роботни дзень од 13 до 16 годзин.

Infinito Dance” представя нову ровновагу и вязу медзи: природу, технолоґию и духом у 21. вику през три уметнїцки фиґури: БАКА (символ природи), ЗАЯЦ (символ технолоґиї), ДЬОВАНА (символ духa). Вони през нєогранїчене динамичне бависко у чаше и простору творя єдинство, щесце, надїю, толеранцию, любов, взаємне прилапйованє, превозиходза гранїци, звонка и знука нашого физичного и психичнoго склопа. През „рухому слику” настава ясна креация новей концептуалней слики – „Infinito Dance” и шицки ґенерациї поволани до процесу бависка и до креираня нового бависка, наводзене у концепту вистави.

Наталия Рибович интернационално активна уметнїца, нарoдзена є у Новом Саде, жиє и твори у Ауґсбурґу. Творчосц Рибовичовей рижнородна и окреме експресивна. Вона медийни уметнїк, маляр и дизайнер. Зоз єй уметнїцку творчосцу упозната и наша заєднїца.

ПОВЯЗАНИ ТЕКСТИ