Дюрдьовчанє победзели у Сусеку

автор Л. Вереш
156 Опатрене

ДЮРДЬОВ – У 11. колу Подручней фодбалскей лиґи Нови Сад, хторе одбавене 22. октобра у Сусеку, фодбалере ФК „Бачка 1923” зоз Дюрдьова победзели у стретнуцу зоз фодбалерами Сусеку, зоз резултатом 0:3.

Стретнуце барз добре почало и Дюрдьовчанє перши ґол посцигли на початку стретнуца, у 2. минути. Млади Желько Тривунович схопно копнул до лабди хтора закончела у процивнїцким ґолу, цо Дюрдьовчаном дало мотивацию же би ище лєпше бавели.

У другим полчаше фодбалере Бачки достали ище єдну предносц, прето же у 54. минути фодбалер процивнїцкей екипи достал червени картон, та Сусечанє бавели зоз єдним бавячом менєй. Тоту нагоду Дюрдьовчанє нє опущели, алє ю вихасновали на найлєпши способ. До конца стретнуца посцигли ище два ґоли и то у пейцох минутох розлики, у 77. и 82. минути.

Вельке число жовтих картонох на стретнуцу, три додзелєни домашнєй екипи и два фодбалером Бачки, як и єден червени картон екипи Сусеку, указую же на терену нє було спортского справованя.

После того кола Бачка на дзевятим месце на таблїчки зоз петнац бодами. У шлїдуюцим колу дюрдьовских фодбалерох дочека други општински дерби, вони ше на домашнїм терену стретню зоз фодбалерами ФК „Гайдук” зоз Чуроґу, а стретнуце почнє на 14 годзин.

ПОВЯЗАНИ ТЕКСТИ