РУСКИ КЕРЕСТУР – У преполней Спортско-школскей гали, всоботу 14. децембра на 19 г отримани традицийни Крачунски концерт Дома култури Руски Керестур.
На концерту участвовали дзеци зоз Музичней оводи ПУ „Бамбиˮ чия фахова руководителька Таня Фейди, а котрих на гармоники провадзел Стефан Колошняї.
Женска и Дзивоцка шпивацка ґрупа Дома култури Руски Керестур под руководством Еуфемиї Планкош котрих провадзел Народни оркестер „Юлиян Рамач Чамоˮ под руководством Кристияна Нярадия.
Наймладша, младша и штредня фолклорна ґрупа под руководством Андреї Штефанко, а у провадзеню бенда „Горуци кромплїˮ под руководством Сашу Плєнкаша виведли два нови и публики интересантни шпиванки.
Специялни госц бул Шпивацки ансамбл „Русинияˮ зоз Гуменого, Словацка, а зоз сиґурну руку водзел их дириґент Срдян Стоїлькович. Вон визначел же зоз нїма наступаю и солистки, сопрани, як и члени оркестра котрих публика мала нагоду видзиц. На концу члени ансамбла „Русинияˮ и Женскей шпивацкей ґрупи присутним виведли Многлїтствиє.
Концерт орґанизовал Дом култури Руски Керестур, а помогло Здруженє гражданох „Руска скарбнїцаˮ, Спортско-школска гала и Основна и штредня школа зоз домом школярох „Петро Кузмякˮ.
