КОЦУР – Фодбалски клуб „Искра”, пияток, 23. януара почал зоз пририхтованями за другу полусезону першенства ВФЛ Сивер у сезони 2025/26.
Искрово фодбалере после павзи од єшеньскей часци, перши пририхтуюци тренинґ одробели на стадиону у Коцуре, а одволали ше скоро шицки бавяче.
Преходни рок ище тирва, а до клубу сцигли даскельо нови мена. Перше помоцнєнє то Мирослав Живойнов, хтори пришол зоз екипи ФК Раднички 1910 зоз Шиду. Друге помоцнєнє пришло тиж зоз екипи Радничкого зоз Шиду то Лука Вулич, а треци нови бавяч Бошко Релїч, хтори пришол зоз екипи Червеней гвизди зоз Нового Саду. Заплановане же би ше приведло ище даєдно помоцнєнє, а до першого тиму приключени и бавяче зоз кадетох Дарко Салонтаї и Василиє Дукич.
Екипа Искри будзе ослабенша у єй часци першенства, понеже зоз клуба пошли троме бавяче: Мариян Малацко, Димитриє Ґрубачич и Лазар Милованович.
Заплановане же би ше одбавело 5 пририхтуюци стретнуца, а перше ше будзе бавиц на нєдзелю, 1. фебруара у Коцуре зоз екипу ФК Омладинац зоз Степановичева.
