КУЛА – Школяр шестей класи тамбури басприм у видзелєним рускокерестурским оддзелєню Иван Планчак вибрани за школяра ґенерациї Школи за основне музичне образованє (ШОМО) з Кули котра ма и три видзелєни оддзелєня, попри у Керестуре ище и у Червинки и Сивцу.
Припознанє му уручела директорка ШОМО Верица Ожеґович 7. юния, у Кули, на традицийним Концерту найуспишнєйших школярох у тим школским року. Иван Планчак достал припознанє од Школи и за тогорочни успихи на змаганьох котри тиж допринєсли же би достал тото припознанє.
Припознаня од Школи достали и шицки други школяре пре свойо тогорочни успихи на рижних змаганьох котрих наисце було вельо. Медзи наградзенима з керестурского оддзелєня попри Планчака ище и браца Иван и Даниєл Фейдийово школяре на тамбури басприм, та брат и шестра Гарвильчаково – Кристина клавир, а Теодор гармоника. Наградзени и їх наставнїки тамбури, клавира и гармоники, за Керестурцох то Геленка Гарвильчак и Мирко Преґун. Наградени и наставнїки цо робя у Кули, наставнїк тамбури Владимир Медєши и наставнїца виолини Лїляна Барна Никитович котрей аж седмеро школяре на змаганьох однєсли перши награди цо ше ище нє случело у тей музичней школи.
Шицки спомнути як и други найуспишнєйши школяре ШОМО у тим року потим наступели за числену публику у шветочней сали Школи.